ازاى تعرف انك بقيت شخص مراهق ؟

ازاى تعرف انك بقيت شخص مراهق ؟

بقلم الاستاذ القدير عمر طاهر

1- فجأة يبقيت رومانسى فى نفسك بشكل مبالغ فيه لدرجة ان اى واحدة تشوفها تحبها على طول ,

2- بقيت شخص ملول يسيطر عليه الزهق سيطرة التمساح على غزالة صغيرة من رقبتها لدرجة ان اى واحدة تحبها بتزهق منها بسرعه ** ,

3- فجأة بتلاقى مناخيرك هى اسرع حاجة بتكبر فى وشك لدرجة انك بتخاف تبقى ( مجرد مناخير ) ,

4- بقيت بتقف فى المراية كتير ، و تمتعض عندما تنظر الى وجهك ولا تفهم سر هذه الحبوب المنتشرة فيه كانتشار اعلانات ساقية الصاوى فى شوارع القاهرة ** ,

ـــــــــــــــــــــــــــــــــــــــــــــــــــــــــــــ

* لو معرفتش تسيبها لانها لازقه لك هتضطر تعرف عليها واحده جديدة ,, هاعمل ايه يعنى ؟

* فخور اننى غير مدخن ,, الدائرة ( البيضه )

ـــــــــــــــــــــــــــــــــــــــــــــــــــــــــــــ

5- صوتك يخشن و تشعر ان احبالك الصوتية تكسوها طبقة عبارة عن خليط من التراب و حبات المطر ، و تلاحظ انك بدات تتحول لغوريلا مع هذه الكميه المبالغ فيها من الشعر التى تظهر فى ايدك و رجلك و شك و تزداد كثافة حواجبك للدرجة التى تجعلك ( ترقًصهم ) فى المراية كتير **,

6- فجأة بقيت مقاستك بتتغير بسرعة للدرجة التى يطلق معها من حولك عليك لقب ( الشحط ) ، لكن الامر بالنسبه للبنت التى يبدأ المحيطون بها فى منحها لقب ( مدموزيل ) ,

7- اقاربك البنات بقوا لو دخلت عليهم فجأة و هما قاعدين على راحتهم يتخضوا و يتعدلوا فى قعدتهم ** ,

8- اصبحت فجأة تؤمن بعدة شعارات ، أهمها ( انا حر ) على اساس إنه ( ماحدش فاهمنى ) ، و ( و ماحدش ليه دعوة بيا ) لإنه ( ماحدش فاهمنى اصلا ) ,

ـــــــــــــــــــــــــــــــــــــــــــــــــــــــــــــ

* يا عبيط

* ابقى خبط قبل ما تدخل يا شحط

ـــــــــــــــــــــــــــــــــــــــــــــــــــــــــــــ

9- بتحاول بقد الامكان تآخد العربيه من ورا اهلك , و بتبقى حريص و انت سايق العربيه ان الناس كلها تشوفك و انت بتسوق ، علشان كده بتبص حوايلك كتير و انت سايق ، و علشان كده العربيه بتخبط منك كتير ، و علشان كده باباك مابيرضاش يديلك العربيه **,

10- بتغير رنة الموبايل بتاعك كل يومين ,, و الكول تون كمان ,

11- اهلك بيعترضوا دايما على نوعيه الاصدقاء اللى فى حياتك لانك بتتشد بسرعة للعيال الفاقدة و بتعمل لهم addبدون تفكير ، و تفخر بصداقة الى اكبر منك و تكون حريص على صداقة واحد فى الجامعة و ياسلام لو كان بيسقط فيها كمان و بيدخن و اهلاوى و بتاع بنات ، و لانك لا تتنافس مع اصدقائك فى حاجة مفيدة ، و لكن تتنافس مع اصدقائك فى القدرة على اخراج اكبر كمية دخان من الفم و الانف اثناء تدخين الشيشه فى الكافيهات ( المتداريه ) ** ,

12- تبدأ التفكير فى موضوع التدخين على سبيل التجربة ، و هى تجربة طريق واحد مافيهاش رجوع ,

ـــــــــــــــــــــــــــــــــــــــــــــــــــ

* و عشان كده انت بتاخدها من وراه ,

* بس صدقنى هتتقفش قريب ,

ـــــــــــــــــــــــــــــــــــــــــــــــــــ

13- الاندر وير بتاعك باين من بنطلونك الى ساقط معظم الوقت **,

14- عندك درج زى بتاع اختك فيه اكســسوارتك اللى بتخرج بيها ( سلسلة فى نهايتها جمجمة معدنية او اول حرف فى اسمك و احيانا اسمك كله ، سلسلة المارينز التى تنتهى بقطعة معدنية بيضاوية الشكل ، و اذا كنت لا تحب السلاسل يبقى الجنزير ، و حظاظة من الكتان او حظاظة عبارة عن مجموعة متشابكة من الخيوط الملونة ، الكاب صيفا و الآيس كاب شتاء ، ميدالية المفاتيح الميتال او الجلد او الميدالية القماشية الطويلة ، و ساعة يد ضخمة ، و السماعة البلوتث ، و علبة السجاير المعدنية و الولاعة السخان ) ,

15- بتحاول تدور على ستايل جديد لنفسك كل شوية ، ولان قدرتك على الابتكار محدودة بتقلد تقليد اهبل ** ,

ـــــــــــــــــــــــــــــــــــــــــــــــــ

* كوول يا مان ,

* المفروض اقول تقليد اعمى ، بس ازاى اعمى و انت بتقلد الى بتشوفه يعنى مش اعمى ولا حاجة ، لكنه تقليد اهبل لانك بتقلد من غير ما تفكر ,, يا اهبل , تختار طريقة مش عجبتك فى فيلم او كليب و تقرر انها تكون طريقتك انت الشخصية فى المشى ، و الكلام ينطبق على طريقة الكلام او طريقة الرقص او طريقة تثبيت ،

ـــــــــــــــــــــــــــــــــــــــــــــــــ

16- تتابع بقوة كل اخبارالفنانين و تعرف عنهم مالا يعرفوه هم عن انفسهم ، و مثلما تتابع اخبارهم تتابع اعمالهم و ( ماتعديش فيلم نزل فى السوق من غير ما تشوفه ولا البوم من غير ماتداونلوده ) !

17- تصدق الشائعات و بتنقلها اسرع من البلوتوث بدون تفكير ,

18- بقيت تكره اسم الدلع بتاعك و بتتكثف منه و تعتبره اهانة احيانا ,

19- تبتدى تعتبر اى حد بينقدك او بيعدل عليك او بيوجهلك نصيحة انه بيشتمك ** ,

ــــــــــــــــــــــــــــــــــــــــــــــــــــ

* المشكلة انك فى السن ده هتلاقى كل اللى حواليك بيعدلوا عليك و كانك حيطه المايله فى المجتمع,

ــــــــــــــــــــــــــــــــــــــــــــــــــــ

20- تتحول الى مدمن نت ، لدرجة انك لما بتقفل الكمبيـوتر بتحس بفراغ عاطفى ، و لو قلقت بليل و قمت تشرب و انت راجع لازم تشيك على الميل ، و لو حد قالك نكته تقول له ( لول ) ، او اى واحده تشوفها تعجبك تبقى عايز تحرقها على سى دى و تروح بيها ** ,,,,,,,

المشكلة ان كلمة النت تعنى لك الجديد فى عالم الاغانى و الكليبات ، و كلمة الشات تعنى لك الجديد فى عالم الحريم ، وتختار لنفسك اسما على الشات يدل على رومانـسيتك الحزينة ( امير الرومانسية ) او على شعورك بالعظمة ( نجم امبابة ) او على تفاهتك ( عاشق هند صبرى ) او على وجهة نظرك فى نفسك ( السفاح ) او لا يدل على شىء ( دودى 122 ) ,

21- بتغير الباسورد بتاعت الكمبيوتر بتاعك كل يومين ( انت فاهم ليه طبعا ) ,

ـــــــــــــــــــــــــــــــــــــــــــــــــــ

* ممكن ( تاخدها على فلاشه ) ,

ـــــــــــــــــــــــــــــــــــــــــــــــــــ

22- عندك دايما هيدن فايل على الكمبيوتر موجود من نسخه على الفلاشه !!

23- نفسك يبقى عندك لاب توب علشان ــ بس ــ تروح تقعد بيه فى الكافيهات ,

24- دايما بتتصور مع اصحابك مش صور للذكرى و لكن صور للفيس بوك

25- ممكن تطنش واحد شتمك بالام بس ممكن تقـرقش اى حد يجيب سيرة اختك ** ,

26- اصبح فى حياتك اشياء كثيرة لا يعرفها الاب ولا الام ,, ( و انت فاهمنى طبعا )

27- يسيطر عليك احيانا شعور بان اهلك مش عاجبينك

28- تهاجم ( اى حـد يلعــب فى حاجتــك و انــت مــش موجود ** )، و تبتدى تحلم تعيش لوحدك ,

ـــــــــــــــــــــــــــــــــــــــــــــــ

* حمادة الدكر ,

* علشان كده انت عامل باسورد ,

ـــــــــــــــــــــــــــــــــــــــــــــــ

29- تفكر ان ( ايه اللى هيحصل لو هربت من البيت ؟ )

30- تتدرب على فكرة السابقة بان ( تسيب البيت بعد كل خناقة ** ),

31- تبطل تسال ماما السؤال الطفولى المعهود ( ماما انـا جيت ازاى ) ، و تبدأ فى رفض الاجابة عن سؤال ( انت رايح فين ؟ )

32- تشعر دائما ان الفضول هيموتك ، و عايز تعرف كل حاجة ** و فى نفس الوقت مش عايز تقول لحد اى حاجة

33- تعرف جيدا خريطة الكافيهات فى مصر و المينــيمم شارج بتاعت كل واحده ,

34- تتابع كل مباريات المنتخب فى الاستاد ، و تبقى حريص كل مره انك تدهن و شك عالم مصر قبل ما تتحرك من البيت ,, ( ممكن تدهن عند الاستاد بخمسة جنيه لو بابـا من النوع الى مستحيل يسيبك تنزل من البيت بالمنظر ده ,, بس ما تنساش تغسل وشك قبل ما تروح ) ,

ـــــــــــــــــــــــــــــــــــــــــــــــــــــــ

* ساعتها هيبقى عندك حجة مقنعة انك تدخن

* عايز تعرف كل حاجة تافهة زى ( روبى مصاحبه مين ؟ ) ،,, و انت مالك انت مصاحبه مين ,

ـــــــــــــــــــــــــــــــــــــــــــــــــــــــ

35- علاقتك بالدين تتذبذب ما بين طناش مبالغ فيه او اهتمام مبالغ فيه ، تصلى ايام الامتحانات ** و فى الاوقات التى تعانى فيها من مشاكل ، و ما ان تنتهى حتى تعود كما كنت ,, و يمكن اوحش ,

36- تبقى سطحى و تتعامل مع الحياه بطريقة واحد لا يقرأ فى الجريدة سزى المـانشيتات ، و تصبح الشخص الذى يعرف ان احمد زويل حصل على جائزة نوبل ، لكنك لا تعرف ( حصل عليها فى ايه ** ) ,

37- تتخلص اخيرا من الحلاق الذى اختاره لك والدك فى الطفولة ، و تبتدى تختار الكوافير بتاعك بنفسك ,

38- تسمع كثيرا تعليق واحد من المحيطين بك تعليقا على بعض تصرفاتك ( بطل بقى شغل مراهقين ) ,

ـــــــــــــــــــــــــــــــــــــــــــــ

* على فكرة مش تصلى لربنا لما تكون محتاج له ، العيب انك ما تبقاش عارف ان البنى آدم محتاج لربنا طول الوقت ,

* حصل عليها فى الكمياء,

ــــــــــــــــــــــــــــــــــــــــــــ